大律師出身嘅林作日前就搵嚟同樣簽咗畀范振鋒嘅29歲、世界武術賽冠軍鄭仲恒拜師學武。做得林作師兄兼師傅，鄭仲恒當然有番咁上下。

據資料顯示，鄭仲恒6歲開始學龍形拳，8歲加入香港武術隊，14歲去咗北京運動學校受訓四年，畢業於北京體育大學，佢精於長拳、刀術、棍術同對練。鄭仲恒一直係香港武術隊，先後參加過世界唔少大型比賽，08年喺北京奧運武術比賽刀棍全能中獲得銅牌，11年喺土耳其舉行嘅第11屆世界武術錦標對練中摘下金牌，而佢喺前年退役。

鄭仲恒唔止功夫了得，原來都有演藝天份，佢11年參加過大台搞嘅歌唱比賽《超級巨聲3》，成為最後十強，不過因為撞到要去土耳其參加武術比賽被迫喺第十集後退賽，之後鄭仲恒又參加過內地歌唱節目《中國好男兒》。有指老闆游說咗佢簽下一紙8年長嘅賣身契，有意力捧佢做動作演員，而鄭仲恒簽約後即獲安排參演拍攝中嘅電影《狙擊密令》，佢喺戲中同安志杰有好多動作場面。

為咗做動作演員，鄭仲恒同時喺演技方面努力：「動作演員唔止要識打，我之前去咗跟King Sir（鍾景輝）學戲，學下方法演技。」佢仲話頭號偶像係「宇宙最強」甄子丹：「丹爺未成名作品我全部都有睇，佢係與時並進嘅動作演員，佢會將新元素加入。」鄭仲恒話加入幕前唔係想發明星夢，希望將武術發揚光大：「我退役後入過無綫做替身，係睇唔到樣嗰啲，要由二樓落嚟㗎。」o依家捱出頭，不單見樣，仲考演技兼有對白，鄭仲恒當然要努力打出名堂。

場地：FAC