真係小巨肺Celine都要嗌佢師兄！

Celine究竟能否殺入《全美一叮》準決賽，香港時間本月13號早上就有得睇，但結果要翌日先至公佈。

當大家為Celine擔心之際……令人不禁諗起——04年參加美國綜藝節目《一夜成名》（American Idol）嘅William Hung（孔慶翔）。"I already gave my best, and I have no regrets at all."

五音不全，再加上不經意嘅搞笑外型，以騎呢方式演繹Ricky Martin嘅《She Bangs》一夜成名，事隔多年，仍然有好多人記得佢，William Hung今日喺洛杉磯時間晚上7點30分左右，喺一個公園接受美國《蘋果》fb直播。(文章連結： http://bit.ly/2iQdot9 )

出過三張唱片嘅William，曾經喺洛杉磯警署擔任分析員，依家轉咗去衛生部門做行政助理，又做埋勵志演說家，佢話：「有時喺演講亦都有表演，我會繼續唱《She Bangs》，呢隻歌帶俾人歡樂，係好事，演講好處唔止娛樂，仲可以傾吓心聲、講吓故事，同埋人生經歷有冇啲乜嘢難處。」

話晒William係參加歌唱節目嘅始祖，又點可以唔問吓佢點睇只得9歲嘅「小巨肺」譚芷昀（Celine），以香港人身份出戰《America's Got Talent》成功晉級(新聞連結： http://bit.ly/2eNQlL6 )，William話：「佢好有天份同勇氣去試，希望佢盡力而為，成功梗係好，失敗都唔可以放棄自己嘅夢想！」

小小年紀要承受各方壓力，來自比賽也來自爸爸，來自爸爸嘅壓力又有兩種，一種係爸爸要佢練歌，一種係……爸爸引來嘅負評轉嫁到Celine身上。

William就話：「女仔有機會出名成名…應該點講呀？最緊要係…你個心，你個心想唔想去做嗰件事，好重要。我都花咗13年時間搵到我真係好想做嘅嘢……你覺得表演、唱歌係咪你個心好想做嘅呢？定係你家長迫你去做嘅呢？呢個係第一樣嘅考慮。第二就係，本身你係咪真係鍾意呢樣嘢？你係咪未來十年二十年都會做呢樣嘢？我知佢好後生，但呢樣嘢都係需要考慮嘅。」

唔知佢又會唔會再參加呢類比賽呢？佢話：「如果請我做嘉賓，評判或者表演會做，但係參賽嘅話就唔係太適合，我知道唱歌唔係自己嘅天份，個個人都知，點解繼續唱？因為呢啲係人生經歷，大方分享等大家了解多啲我，唱歌比賽唔啱我。」

咁啲咩咩《好聲音》又會否參加、或者有冇人搵過你？William又有啲靦腆咁話：「因為我知道自己呢…唱歌唔係我天份嚟0架，但點解我會繼續去唱，點解我會繼續演講去講番呢樣嘢呢？因為呢個係我人生經歷，個個人都想知我個人生經歷係點，我避免唔到，所以我大方分享。」

o依家網上有啲人醜化自己出位，問William 點睇時，佢話：「我覺得唔係咁好，要突出有好多方法，我有啲朋友想演講成功，我就話比佢聽要有自己故事，每個人都有佢自己故事，你經過唔同痛楚或者肥佬（失敗）過程，你點樣解決，等啲人可以向你學習，呢個係行得通，因為呢個係幫助到大家，對社會又有貢獻。如果醜化自己嚟突出賺錢，我就覺得唔係咁好囉。」

可能大家會關心佢會唔會再唱歌？William話：「有人邀請我嘅話，啱咪唱囉，做人嘅嘢係把握機會。」