第二次結業嘅影藝，上月28日喺九龍灣淘大向大家道別。當時已有傳會改由UA院線接手，依家宣佈咗喇：真係UA。

即係話，繼UA Megabox後，UA院線喺九龍灣開第二間戲院。弔詭嘅係，MCL德褔，前身係UA德褔。

EMAX有星影匯，德福有MCL，Megabox有UA，依家UA食埋影藝攞埋淘大班客（影藝前身就係百老匯九龍灣戲院），好事定壞事？

晚上9點，UA向傳媒發新聞稿，宣佈喺淘大開新戲院。連同年初於青衣開嘅戲院，預計今年UA院線將有四間新戲院落成——即深水埗、青衣以及大埔，其中深水埗選址，正正是高登電腦中心，預計今年上半年落成。

第一代嘅影藝，係專門播放藝術、非主流電影嘅戲院，88年最初設於灣仔港灣道新鴻基中心，06年結業，09年於淘大復活，設3間戲院共696個座位，重開後將改變經營策略，播放主流電影為主，上月28日「二度死亡」。

依家UA接手，新聞稿上話UA淘大會係「以香港情懷為主題」，預計今年下半年開幕，共設有3間影廳、逾600個座位，即係仲少過影藝嗰陣。

大家最關心嘅票價，新聞稿只係話「將會參照九龍灣鄰近戲院」——即係連鎖式戲院價錢，同以前影藝$65、$55就有得睇，冇得比。以前影藝係「窮人至愛」又就腳，真係可以平到$50，但出面／同區其他較新院線可能講緊$70。可惜，依家影藝平價飛已成絕唱。

至於UA淘大點樣「以香港情懷為主題」呢？話係戲院設計、小食方面會「添加香港獨特元素」……係咪賣懷舊小食？真係唔知。

UA仲話，新戲院設有多用途活動室，設置投影機及投影幕，提供包場服務，Menu仲有專業餐飲團隊為客人度身設計，呢個做法咁似EMAX嘅星影匯嘅...