寸嘴Barbie夏尉喻以35D上圍和出位言行，成功躋身電影圈，當日rap住參與周星馳《美人魚》選拔，令人極難忘。不過4個月前她突然引退，在科學園一家設計app的公司任職OL，過着朝九晚五的新生活。
本報日前直擊探訪Barbie，她說早前荷爾蒙失調，肥腫難分，在鏡頭前自信全失，甚至不想見人，為了生活她決意轉職。採訪當日Barbie衣着樸素，又自備沙律當午餐，生活健康有規律。

調理身體未忘星夢

Barbie由精采的藝人生活，轉做平凡OL，她說：「都係一份工作，但工作模式的確可以對調理身體有幫助，我個病最緊要作息正常。」不過Barbie強調不放棄娛樂圈，如果幕前有工作會照做，她只想自我增值說：「話晒都I.T.界，我只係返咗短短4個月，的確冇乜建樹，會繼續摸索。」做OL月薪計收入穩定，她說：「幕前單件都等於𠵱家月薪，但呢份工勝在穩定，幕前唔係成日有工作。」Barbie預計休養半年直至完全康復，她亦要定期見醫生，做推拿，最重要是作息定時。
做過藝人的Barbie，現在主力推廣公司的app，有時會外出見客，她說：「如果認得我嘅人，只會慳返打開話題呢part，佢哋會話你好熟面口喎，但最終都係好實際，完全冇着數。」
採訪：卓寶花
攝影：陳慧安