正服兵役嘅韓國天團BIGBANG成員T.O.P雖然近日捲入吸毒案及疑似服藥自殺一事，影響人氣之餘，其所屬嘅YG事務所亦股價大跌，不過似乎唔多影響到組合成員，其隊長G-DRAGON(GD)日前推出新碟《權志龍》，噚日於首爾世界盃競技場舉行世界巡迴演唱會《Act III, M.O.T.T.E》，除多位演藝圈好友撐場外，更邀得「國民妹妹」IU及CL擔任嘉賓，吸引4萬名粉絲入場。

其間GD又感性地表示：「喺某一瞬間開始，我就以G-DRAGON呢個名生活，(製作新碟時)我會諗返『原來嘅權志龍係個點樣嘅人呢？』，呢段時間令我知道自己係一個點嘅人，亦令我對已經失去咗嘅嘢進行領悟。」而現年28歲嘅佢已屆韓國入伍當兵嘅年紀，GD亦預告將於明年入伍：「今次可能係我(入伍前)最後一場演唱會喇，退伍時我已經年過30歲，咁都冇所謂？」粉絲立即高呼「冇所謂」，不過GD就搞鬼地表示：「對我嚟講有所謂，到時就唔可以好似依家咁整美甲喇。」

而GD嘅新碟推出4日依然人氣高企，截至韓國時間今早9點，新碟嘅主打歌《無題》連續4日包攬Melon、Genie、Naver等8大音源榜榜首，《無題》MV嘅點擊率更逾千萬點擊。