八方睇過本新書節錄，載有好多曾鈺成嘅年輕照片，包括當時嘅黑框眼鏡文青look，嗰副厚厚嘅眼鏡，說明佢讀書應該好用功，大家亦可以發現佢應該從來都冇肥過。（細佬曾德成同樣極粗框！）
論壇主持話見阿曾立法會辦公室好多字典，阿曾自爆現時主要睇手機、上網查，仲陰陰嘴笑稱：「我唔係睇何俊仁嗰啲！」佢話黃毓民發言時成日拋書包，自己都要上網查吓有冇錯，更正議員讀錯字詞前，除非自己好肯定，否則都會先查一查字典，「唔敢當自己所有嘢都識晒。」
退下火線，阿曾話當年，竟然有啲良心發現，回想以前窒記者、喺居民大會窒一個篤佢心口嘅師奶，都令佢感到好心涼，結果當年立法會選舉輸咗，令佢知道選舉唔可以咁做！其實𠵱家笑騎騎，同記者和睦相處，咪幾好，點都好過當年咄咄逼人。