林峯早前宣佈幫無綫唱歌兼拍劇,因而惹嚟佢簽約星夢嘅傳言。日前佢喺灣仔接受訪問時為事件澄清,話今次回巢純粹係為《使徒行者3》開工,自己係古天樂旗下經理人公司嘅藝人,同公司仲有宣萱同佘詩曼。
林峯提到《使徒行者》係離開無綫前最後一個角色,佢話:「好多謝大家鍾意,一個角色有機會再去演,我係覺得劇本或者角色仲有發掘嘅地方,我聽過故事大綱,我覺得係可以合作嘅項目,所以好開心有機會再同TVB合作。」提起工作就講到停唔到口,但一提到女友張馨月就收口,佢話:「我講咗以後唔講感情,總之呢啲嘢順其自然,人生階段嘅嘢……總之多謝大家關心,我真係唔分享喇。」