蘇保羅第五場搵愛將梁家俊騎隻「有綵」,此駒直路後發先至,力壓潘頓座騎「新標誌」,成為蘇廐今季首匹頭馬,與「有綵」同主之「淳綵」跑第三,「綵」系包辦10倍位置Q。
「有綵」之前兩戰田草C跑道一冠一亞,呢場配最佳拍檔梁家俊於同一欄位跑1400米,成功增添佳績,反為「新標誌」卻唔好彩,上季至今未贏過,容天鵬對馬主仲未有交代。另一方面,落飛黨開季以來執豆咁執,今場佢哋將「有綵」同「新標誌」Q由55倍過外落重注打到着啡燈,最終真係一Q返,跑完得番25倍,少原本一半有多,涉及注碼約45萬,落飛黨扣本後有約1,100萬落袋。自本月13號開鑼以來,啡燈Q幾乎次次賽事有得開,落飛黨呢個九月份簡直係春天,豬籠入水嗰隻!
練馬師蘇保羅表示,此駒今場意外多多,不但起步遲緩,轉彎時鞍上人梁家俊需要力騎維持位置,直路又一度沒有空位上前,可是當望空後,馬兒即展示強橫後勁,人馬表現均值得讚賞。