日本大地震後爆出輻射危機，當地食水食物驗出含輻射，有料食物未輸入香港，人心恐慌卻勁過輻射塵殺到埋身，本地日式食肆直接受衝擊真正冇啖好食，飲食界議員張宇人同飲食業界發起「愛‧日本料理」優惠推廣活動，噚日請特首煲呔同多個高官食日本魚生、壽司，齊齊以行動撐日食。
呢個活動以品嚐日本美食為主，政客在場卻係食「政治口水尾」，事關溫總上星期訪問日本，已經率先食咗來自災區食物，同時宣佈放寬日本食物進口中國，總理都放心食日本嘢，煲呔何懼之有？可惜狗尾續貂，溫總食嘅嘢來自災區，香港高官食嘅卻多數來自非災區，層次差好遠。

邊食邊答猛話好味

煲呔噚晚試食都幾豐富，先食油甘魚壽司、海膽刺身、甜蝦壽司同埋三文魚子壽司，記者問佢好唔好食，煲呔一邊食一邊答，猛話好好味，由此觀之，八方肯定啲魚生真係極品。佢又話對日本食物好有信心，因為信得過日本出口嘅食物品質同埋本港嘅入口檢疫制度，市民唔使擔心。
煲呔幾乎年年遊日本，佢噚日自言日本菜係粵菜之外最鍾意食嘅菜式，又話自己好鬼為食，乜嘢都覺得好食咁話，話口未完，就喺壽司吧前即時叫師傅追加多一碟油甘魚壽司。食完壽司意猶未盡，臨走前又淺嚐來自佐賀嘅A4級和牛。件牛肉脂肪均勻，師傅擺落鐵板「滋」一聲即油香爆發，難怪煲呔食到好滿足。
署任商務及經濟發展局局長蘇錦樑噚日都在場，佢密食當三番，大讚日本嘢好食。阿蘇剛剛以局長身份遠征APEC會議，話以前做副局長時唔使開咁多會，家身兼兩職連走多場忙到氣咳。既然熱定身，幾時都上得位啦。

mailto:[email protected]