當年今日

拍步操無端講冬天中暑
千嬅烏鴉嘴應驗臨記暈倒

蘋果日報 2002/01/03 00:00


楊千嬅日前和吳彥祖為新片《新紮師妹》拍攝一場女警步操場面,其間千嬅戲言冬天中暑可成創舉,想不到竟有一名女臨記拍至暈倒。而千嬅原本有場膝頭頂警官下體的戲份,可是臨時卻由替身代替。
楊千嬅及吳彥祖日前在由警察部借出的軍營內,拍攝由馬偉豪執導的新片《新紮師妹》,該場戲講述扮演女警的千嬅進行步操,而電影公司為求逼真,特別安排真輔警一同步操。
不過拍攝期間,有一位女特約演員暈倒,最巧合的是千嬅事前曾戲言冬天太陽也如此猛烈,一旦「中暑」,大可成為創舉,估不到一語中的,變成烏鴉嘴。

邊拍邊叫苦
在烈日當空下拍戲的千嬅邊拍邊叫苦,她一有空就躲在陰暗處休息。千嬅接受訪問時說:「今朝早開工,已經諗咁曬會唔會暈倒,如果冬天都中暑,可以幫仁濟籌款做創舉啦。」
千嬅講完這番話不久,即有特約演員暈倒,她說:「我唔係想咒人,咁都噏得中,真係要去買六合彩。」

膝頭頂下體
首次扮女警兼學步操,千嬅說:「拍之前學咗半個鐘,原來要操得齊真係好難,重有真輔警一齊操,好大壓力,不過咁都唔夠有場戲講我同教官敬禮,點知提起膝頭撞到阿Sir下面,到時唔識就力,就真係好尷尬。」
不過到正式拍攝膝頭撞警官場面時,卻有替身代千嬅頂上,導演馬偉豪說:「我驚佢(楊千嬅)真係唔識就力撞親人,用替身都冇問題。」