OL着起高踭鞋婀娜多姿，實際有苦自己知，好多人雙腳被高跟鞋夾到變形，唔怪得駐診中環嘅足病診療師（Podiatrist）劉庭耀（Ryan）門庭若巿啦。
全港認可註冊足病診療師僅30多位，做咗10年嘅Ryan受聘醫療集團，亦有在私家醫院掛單，仲要照顧埋醫管局足病門診嘅病人，每日平均睇30人，一周五天工作，有數得計，一年經佢手診治就有1,800對腳。

Ryan同八方講，搵佢嘅病人七成係女性，當中多數係OL，近年求診病人每年以5%增長，都咪話唔犀利。佢指OL足部毛病主因係長期着唔適合嘅高踭鞋，香港特別嚴重，因為市面嘅鞋呎碼係一碼上，唔似外國有半碼，「唔啱碼焗住着，好易足底筋膜炎、腳趾外翻」。
講到趾足毛病最嚴重嘅行業，空姐排首位，Ryan話空姐足趾外翻好普遍，因為喺高空工作易令雙腳水腫趾掌受壓變形外翻，「解決方法係帶多一對大碼鞋，腳腫嗰陣着，按摩外翻腳趾附近嘅肌肉。」Ryan建議空姐可以着弧形鞋底嘅健步鞋，行路時將力點從腳踭移動至腳掌、腳尖。Ryan話呢啲健步鞋以前多數係醫療用，Ryan近月以身試鞋，着上美國Skechers健步鞋做實驗，試吓效果，「有啲鞋頭較闊嘅款式幾啱腳趾外翻嘅OL，可以防止惡化」。

無端端走咗去澳洲大學讀四年足病診療理學士課程，劉庭耀話背後有段古。Ryan話自少愛打籃球、足球、排球，經常拗柴、斷腳，出入跌打醫館係家常便飯。
久病想成醫，因此志願係做跌打醫師。Ryan天真得嚟都好實際，學跌打唔會有「沙紙」傍身，恐怕生活冇保障，覺得做唔過。讀預科時有次去醫院探病（佢特別澄清唔係斷腳入院），見到醫院有一個足病診療部門，搜集資料後發現本港大學冇呢科讀，要去到澳洲、英國同美國先有得讀，最重要係畢業後在當地註冊，回港可獲醫管局認可。
醫腳有錢途，Ryan決定到澳洲升學，全班得佢一個亞洲人，加上佢對腳早就斷到五勞七傷，自然成為同學活體學習對象，有乜嘢足部奇難雜症，都搵Ryan頂上。