立法會3.11補選，民主派喺新東嘅補選都競爭激烈，工黨郭永健有唔少主流民主派政黨力撐，新同盟范國威有一批地區椿腳支持，學聯前常委張秀賢似乎可以吸納到部份本土派，但似乎同另外兩位對手相比，都係號召力差咗少少，今日終於有皇牌登場為佢造勢。銅鑼灣書店創辦人林榮基同佔中醫療隊召集人歐耀佳醫生，親身去到張秀賢嘅大圍街站支持一番。

林榮基話撐張秀賢嘅原因，係因為佢嘅政綱好詳盡，對香港目前面對嘅問題有清楚了解，甚至比老一輩更熟悉，而香港未來要依賴新一代作改變，睇唔到其他新東參選人有呢個特質。

歐耀佳就話，無論佔中或反國教期間，都見到年輕人對真理嘅追求，反而好多老一輩嘅人已經漸漸麻木，覺得年輕人嘅熱誠可打動社會，所以支持張秀賢出戰補選。