韓國女團少女時代近日回歸樂壇,而少時嘅前成員Jessica自從退團之後,作個人發展都進展得相當唔錯,特別喺進攻內地市場方面Jessica就好積極。
而要打入內地市場嘅最好方法就梗係上綜藝節目,Jessica近日就上咗由謝霆鋒主持嘅內地節目《12道鋒味》,做新一季嘅嘉賓,有網民就上載咗Jessica喺體育館拍攝時嘅情況,現場就唔見霆鋒,不過見到陳偉霆喺現場,陳偉霆仲要孭起Jessica,唔知係唔係接受啲咩挑戰,Jessica被陳偉霆孭起時就表現得好緊張,仲用雙腳夾實對方,而陳偉霆唔知係唔係嫌Jessica太重,定係自己太攰關係,只見佢孭到反晒眼,仲好似擔心條褲就甩咁,死拉住條褲,真係好鬼搞笑。
而佢哋今日拍完節目,陳偉霆即刻喺微博大晒同Jessica嘅合照,仲話多謝對方送畀佢嘅太陽眼鏡。
另外,少時日前上咗KBSCOOLFM《SuperJuniorKissTheRadio》電台節目,佢哋就大爆自己嘅keepfit心得,當中徐玄就話自己唔食嘢,之後先更正話:「其實係運動,要多做運動,咁就唔使節食,只要運動就可以。」
其他成員都話佢哋都好為食,冇可能節目呢。而允兒仲話之前返內地拍劇,因為中國菜太好食,搞到佢肥咗唔少。