噚日，華華收到短訊同傳真爆料，話美聯（1200）東南九龍同將軍澳營業董事郭玉滿（洋名AngelaKwok，人稱AK姐），用唔同嘅方法罰啲前線主管錢，仲話AK姐會先向下屬經理每人收5000蚊，做唔到單就沒收，但收番嚟嘅罰款，部份下落不明！
華華噚日問過一個美聯將軍澳區前主管，佢話內部有罰錢同夾錢呢個傳統，好似遲到或update嘅盤唔夠數等等，都要罰錢，經理每月交200蚊，區域經理同區域董事就分別交400蚊同600蚊，用喺每月開會費同年尾整獎盃之用。佢同意罰錢都係有正面作用嘅，之但係啲罰款點用，條數就要公開，咁先至就最公道！

罰款制度唔合法

AK姐又點講呢？佢高呼寃枉，否認有搞罰款制度，話係有人搞小動作。佢又強調，如果真係有問題，就已經上咗（交咗）畀ICAC啦！至於話先收啲經理5000蚊，佢話「一蚊都冇收過」，只係口頭催促班經紀，但承認每月有搞生日會，同事每人夾300蚊食一餐，但都係自願性質嘅。
華華向其他代理行八過，佢哋話行頭有罰錢嘅做法，但因為好似話唔合法，所以都係啲細分區阿頭「圍威喂」咁逼班前線做好啲，收到嘅罰款就成班同事擦餐勁。美聯集團公關部就話，正喺度了解緊件事，唔方便講咁多。呢單罰錢羅生門到底誰是誰非？真係要搵包公審吓嘞！

李華華
mailto:[email protected]