要走的始終要走，鄭家富噚日終於宣佈退出民主黨，其實幾年前少壯派集體退黨時，阿富已經有機會同民主黨分手，可是最後關頭改變初衷，冇同其他兄弟共進退。
身為民主黨創黨黨員，決定退黨可想而知阿富心情如何。八方唔知佢最唔捨得邊個黨友，不過今次退黨，感到肉赤卻係事實。據講阿富早前忽然好闊佬，大手筆一次過交咗1,500蚊永久會費畀民主黨中央，點知交錢冇耐就退黨，呢筆錢真係交得唔抵。八方聽聞佢同兄弟討論，還在猶豫應否退黨時，笑言今次真係蝕章。

根據民主黨規定，黨員每年會費300蚊，學生、60歲以上長者等100蚊，如果一次過交1,500蚊，就可以做永久會員，唔使每年交錢續黨籍。民主黨現有600幾個黨員，該黨總幹事陳家偉稱有100多個永久會員，退黨後不會獲退還會費，阿富呢次蝕硬畀民主黨。
阿富上次臨陣變卦，今次的起心肝退黨，據曾經同佢傾偈人士稱，此一時彼一時，阿富似乎對從政感到意興闌珊，話「甘心做個普通律師」，加上想多啲時間放喺家庭，所以唔係太艱難就做出退黨決定，相信日後亦不會轉投其他政黨，因為多年戰友、社民連主席陶君行已率先向佢招手，甚至可代賠1,500蚊畀佢，阿富都不為所動。八方建議社民連豪氣啲，豁免入黨費，加多啲誠意，或者可以打動阿富呢！

民主黨主席何俊仁親自出馬都不能挽留阿富，副主席卿姐更擺出合則來不合則去嘅豁達姿態，八方睇見感觸良多。回想96年阿富同卿姐一齊橫卧灣仔街頭抗議特首小圈子選舉，激烈程度媲美今天80後，贏得瞓街卿美名，今日卻各行各路，日後街頭重遇，你有你嘅生活，我繼續我嘅忙碌，唔知仲有冇偈傾呢？
阿富噚日話呢排壓力大，好彩可以睇世界盃減壓，至於仍然徘徊在似苦又甜之間嘅涂謹申，相信冇心情睇波，繼續腦交戰。

mailto:[email protected]