立法會噚日開始審議高鐵一地兩檢條例草案，喺建制派人多蝦人少修改咗《議事規則》後，加上主席梁君彥強硬剪布，民主派要力挽狂瀾有難度，難怪唔少建制派對兩周內通過草案信心十足，甚至食燒肉提早慶祝。
身兼一地兩檢條例草案委員會主席嘅新民黨主席葉劉淑儀同副主席、民建聯張國鈞，噚日就請食燒肉，葉劉話呢個係「甩身燒肉」，慶祝身為委員會主席嘅佢功成身退，之後交畀梁君彥處理！
連法案委員會正副主席都出手「勞軍」，政府又點可以乜都唔做？負責草案嘅運輸及房屋局今日都請議員同記者食缽仔糕等懷舊小食，運房局話小食係喺石硤尾街市買嘅，山長水遠運去金鐘添馬艦㗎！

邵家臻︰唔食葉太隻豬

但葉劉眼見就唔多滿意，直指局方「出手低」，笑稱下星期要食LadyM，直言「運房局請得起喇」。八方就此問過負責「送貨」嘅運房局政助符傳富，佢話下個星期先再算，而相信建制派或者政府無論送上乜美食都好，面對違憲嘅一地兩檢安排，唔少泛民議員食龍肉都覺得冇味。
社福界邵家臻回應葉劉請食燒豬時直言，「我哋唔食葉太隻豬」！但葉劉似乎介意自己隻豬冇泛民吼，佢話喎：「泛民唔敢食，我食埋泛民嗰份！」

李八方