市況活躍，連積壓多年嘅貨尾盤，都陸續去貨，形勢大好之下，代理幾難得先𠱁到發展商趁節日搞貨尾優惠。
好似嚟緊嘅情人節，中原陳永傑率先搵到華懋吳崇武，為三個新界盤，青山公路傲庭峰、沙田碧濤花園及馬鞍山迎濤灣搞優惠，點知始料不及，俾發展商揼心口。
中記原先諗住，只送三份情侶攝影套餐畀買家，點知華懋嫌中原嘅優惠不切實際兼無誠意。佢話既然優惠針對情侶或者新婚買家，有乜理由限定買兩個單位？
於是即場施壓，要求中記放寬條件，兼加碼送贈，除咗所有買家都可享有優惠外，名額更加由三個增至十個。
幾經考慮後，中記接納。吳崇武都好識做，淨係畀中記嘅買家，可以喺情人節前以舊價（新價提高咗五巴仙）買貨尾，變相多啲客跟中記買樓，即使優惠變咗十三萬幾，超出預算兩倍幾都抵番。

鮑魚燕窩贈代理
以前市道好，地產代理豬籠入水，餐餐魚翅撈飯。
近排歷史重演，太子道西SkyGarden，為鞭策代理，實行送魚翅、鮑魚、燕窩等等做獎品。
三日內促成逾四宗成交，總銀碼又最高嗰位，可獲鑽石勞力士。促成最多宗數，可獲燕窩、鮑魚與魚翅各一斤。
做到最高呎價成交，獎品係SonyEricssonP900型號手電。總值四十萬。
個盤噚日有投資者垂青，用千四萬，連車位買入兩個高層A及B單位，每呎八千五元，創新高。