期指其實是衍生工具一種，與近年散戶熱炒的窩輪及牛熊證一樣，簡單講是賭大細。投資者如睇好後市升，會買入長倉合約，如睇淡則沽出短倉合約。本港期指每日4時15分收市，但近年新加坡IG市場推出網上場外期指交易（俗稱黑期），投資者可全天候24小時任賭。

近兩個月可輸數百萬

現時市場最多人玩的恒生指數期貨，港交所要客戶預先繳交9.59萬元按金先可參與，由於每升跌一點為50元，以現時恒生指數17707點計，一張合約總值88.53萬元，槓桿比率超過9倍。
期指的槓桿效應雖然可帶來豐厚利潤，但同時亦可引致巨額虧損，甚至極短時間內蝕掉已付按金之餘，更欠下經紀行欠款。例如投資者買入一期指合約而未有即日平倉，一旦翌日開市後即急跌1000點以上（蝕5萬元），就算經紀行立即將他的持倉平倉（俗稱斬倉），客戶亦須承擔損失。
恒指8月1日報22663點，惟本周二曾低見16250點，如投資者死唔認輸，不斷補倉頂住，每買一張期指，賬面已輸32萬元，如買入數十張，隨時兩個月內輸足數百萬元。