三月二十五日，《蘋果日報》報道英語十大最討厭口頭禪，立即睇真啲，睇吓自己有冇成日講。睇完之後，發覺有啲係戒唔甩嘅，例如Attheendoftheday、Withallduerespect呢兩個，其他啲都冇乜多犯。最近睇CNBC、CNN嘅訪問，發覺美國人講得最多absolutely，至於其他口頭禪，偶一為之，唔算過份啩。最近開會，經常碰到一位學人講：「tobehonest、說真話、老實講、講真。」大概每十句說話之中，就會出現一次。想深一層，個人習慣咗嘅口頭禪，隨時衝口而出，並不為意，但聽在別人耳朵裏，意思就唔同咯。

十大討厭口頭禪之中，Let'stouchbase亦係好常見。《蘋果》繙譯成：「讓我們言歸正傳?深入探討」，似乎太過正經。左丁山與西方人初次見面，為咗一啲問題，無謂講，冇時間講，或者唔想講，就會話Let'stouchbase，其實係話：「好，我哋日後聯絡」咁嘅意思，全無「深入探討」意味。Touchbase應該係自棒球術語而來，從一壘跑上二壘，隻腳踏到，就算係touchbase，即係接觸到嘅意思。
驚自己出錯，查字典。書架上有一本中文大學出版社嘅《英語常用詞組用法詞典》，RosalindFergusson編著，盧思源（復旦大學五六年外語系畢業，上海繙譯專家）編譯，內有totouchbase一條，譯為：「與（某人）接觸（尤其指經過事先安排好的接觸）」。各方名家如有更精細繙譯，請不吝指教。