【賭馬講呢啲】上仗點到即止 本地一哥呢鋪嚟真(妙瞳)
梁家俊快樂生活妙瞳賭馬講呢啲
香港馬圈一向成敗論英雄,所以楊明綸真係好運中的好運,皆因他對上一次贏馬,已為上季4月尾。
而今季22匹座騎,最叻只有兩次第三,論整體表現,在練馬師眼中,楊明綸仍是「西施」,今期(26日)騎師停賽復出,仍然是出足八場!
曾經提到潘頓今季贏得少而第二超多乃運氣使然,但楊明綸今季陣上發揮,正如早前提過認真一般,所以朋友又問到有可能是「李易達寶藏」的第二場「佳運喜」今次點睇,答案是應要先過楊明綸一關,就算一對呂廐馬「傳奇」及「友風子雨」亦然!
楊明綸此刻運滯,但另外兩位本地薑梁家俊及黃俊今季頭開得好,目前分別居於騎師榜頭五名,尤其小黃今季騎功較過往硬淨,上周末(22日)贏「香江穩勝」騎得起前速又頂到拉士。
這次第四場黃俊騎「紫雲星」,前仗人馬夾檔跑今戰谷草1200米放入接近季軍後,匆匆再出跑泥地同程備受看好,但「紫雲星」在何澤堯胯下,早段卻未如配黃俊般快腳。
今次後者再接手排4檔好位,遇上同場搶放馬不多,「紫雲星」有機會在黃俊胯下放出彩虹。
至於梁家俊今次座騎份量不差,最吸睛的自然是試閘贏一條街的「創意寶」,但剛周末有情況一樣的「勇冠多」表現不似預期,捧得太熱要諗諗。
反而第五場「快樂生活」前季跑出二班頭馬表現指數贏三班谷草一哩,上季只出賽一次擺明有事,今季谷草開鑼賽拉士閃閃身餘勢甚強,「快樂生活」仄馬後明晚再攻贏馬路程,隨時到位。