陳志雲同莊陳有今日喺銅鑼灣行人專用區宣傳呢個月24至8月28號舉行嘅《暗中作樂2016》，佢哋喺街頭進行快閃打鼓活動，咁啱王維基喺附近為選舉拉票，當王維基知道志雲喺度宣傳時，仲用咪大聲問「陳志雲喺唔喺度呀？」但最終志雲都冇作呼應就閃咗，相反莊陳有就有去同王維基打招呼握手。

問到點解唔上前打招呼，志雲話：「同佢咁熟更加避嫌，任何人參選我都支持，所以嗰時知道佢話選我都好支持，多人選多啲選擇。」志雲為咗今日宣傳，早前專登去學打鼓，佢話首次喺街頭玩快閃好刺激。

之後志雲話「以為你哋（記者）會問我王賢誌婚事」，佢主動表示：「我冇去飲，都係睇報道先知消息，未有機會恭喜佢。」問佢羨唔羨慕對方甜蜜婚姻？志雲話：「任何人搵到終身幸福同另外一半，都值得被人恭喜，恭喜哂佢。」

志雲坦言已一把年紀，好難搵對象，所以冇諗婚事，而且結婚一生一世，唔係玩遊戲。問佢真愛出現時係咪會揀外國結婚？志雲話：「都未有對象就諗結婚，太早喇，要有對象、有共識先有得計劃，你哋有冇好介紹畀我識？」志雲話o依家冇另一半，但如果真係要諗一個地方進行婚禮，希望可以喺浪漫地方、英國古堡內舉行。提到佢好友王喜近日四出工作籌醫藥費，志雲透露一直有關心好友狀況，有合適工作亦會推薦。