話說最近台灣有網站票選，香港成為咗最令人討厭城市，其中一個原因係台灣人認為香港服務態度差，令我諗起年初四發生嘅一件事。

年初四嗰晚，有個同我friend friend地嘅澳洲同事帶埋佢個日本朋友飛咗嚟香港。嗰晚佢帶咗我去堪稱全世界最高嘅bar飲嘢，之後佢同佢朋友表示好肚餓，於是我就盡地主之誼，帶咗佢地去食一間出出地名嘅茶餐廳。

一入到間茶餐廳，都正正常常冇乜嘢嘅。我哋坐低睇餐牌，好快就揀好食咩，就叫個伙計嚟落單。我哋up咗幾個餸名之後，伙計mark低咗，然後問我哋飲咩。因為我哋其實未諗飲咩，兩位朋友就開始揭個餐牌睇有咩飲。呢個時候，個伙計就馬上帶住好唔耐煩嘅語氣：「你哋諗好先啦！」

兩位外國朋友嚇親，即刻問我：「What did he say? Why is he so angry?」

唔知係咪我平時慣咗周不時都會遇到呢啲情況，所以見怪不慣，但對於外國人嚟講，真係覺得好匪夷所思……

好啦，到我哋諗好飲咩，就揮手再叫個伙計嚟。但個伙計似乎睇唔到我哋揮手，外國同事就問：「Is he being impatient to us?」

於是我就主動地行出去approach另一個伙計，嗌咗兩杯凍奶茶……

外國同事係咁問我：「點解佢哋咁嬲、咁唔耐煩嘅？係咪我哋做錯咗啲咩呀？」

我話：「唔係……可能新年仲要返工唔開心啩？不過呢……喺尖沙咀有另一間茶餐廳，啲嘢好好食，個店名同你哋個國家都有少少關係㗎……啲店員態度差到出晒名……下次帶你哋去呀……」

外國同事：「吓？乜咁奇怪嘅……？點解態度差都仲要去呀？乜冇其他好食嘅嘢喇咩？」

面對外國同事嘅疑問，我幾乎無言而對，因為作為香港人，我明白服務態度差係香港慣常嘅茶記文化。茶餐廳好講效率，分分秒秒都冧緊檔，所以見你仲要時間諗難免會有唔耐煩，但我又同時有少少明點解外國遊客會咁大反應。回想起飛咗墨爾本大半年，每次出去食嘢，都未遇過話黑口黑面，就算街邊買杯bubble tea，劈頭第一句肯定：「How are you?」有時甚至問你：「你喺邊度嚟㗎？」然後同你傾偈。到你食完，大部分店員都會同你講：「Have a good day!」或者呢啲客套說話已經好似變咗佢哋口頭禪咁，但其實幾次聽落都會令人好舒服。

由於喺外國同事生活嘅環境，服務態度並唔係咁，所以喺香港，當佢哋察覺到個落差，就會覺得：「吓？點解可以咁嘅？」我相信台灣人之所以對香港評分低，都可能因為遇到個別唔禮貌嘅待遇，我回想自己去台灣，就算去便利店，啲店員就算係男人都會提高聲調、聲音甜美地同你講：「歡迎光臨～」

雖然可能會有人話食得茶餐廳，你expect啲咩服務？但偏偏，茶餐廳係外國人其中一樣最容易接觸到嘅地道文化。我明白香港人真係好大壓力，但作為服務業，真係要爭氣呀！


專欄作者簡介：
傭仔
做過廣告、設計、插畫，而家係香港茄子航空嘅一名空少，喺維記澳洲航空交流中。2016年曾出版人生第一本繪本《空少傭乜易》，夢想係成為一個少女系漫畫家。用文字同插畫，同您分享喺飛機上面工作嘅點滴。

Facebook Link︰
http://www.facebook.com/theflyingmaid