林建岳、唐英年及葉澍堃合辦嘅中菜餐廳唐人館第三分店今日喺尖沙嘴開幕，林恬兒、林孝賢、林愛兒、林德信、蘇麗珊及周汶錡等到場祝賀。

剛加盟到林建岳旗下嘅蘇麗珊，早前喺facebook貼左張性感相，搞到啲囝囝心亂如麻。佢今日接受訪問嗰陣話：「好性感咩？我哋嗰日去行山，因為好熱，游生（男友游學修）率先除咗件衫，我見佢好似好涼爽咁，我入面又係運動型嘅底衫，於是就除咗件衫涼下。」蘇麗珊仲笑男友有肚腩要keepfit：「我自己又鍾意食垃圾食物，所以我哋都有一齊跑步減肥。」

記者追問佢貼張咁性感相，係咪對自己身材好有信心先？佢笑住話：「我縮肚縮得好勁架，佢仲笑我話有人讚我有腹肌。」係咪諗住操fit啲可以性感演出？蘇麗珊話最近拍緊動作片：「我要掹個武器出嚟，但係武指話我啲動作太浮，所以都要keep吓，戲路都可以廣少少，但係性感呢個字同我無乜關係。」問到男友有無後悔俾你貼bratop相？佢話：「游生後悔俾我影咗就真，影到佢有肚腩。」