巴西球王比利成75歲，佢仲有冇力，我求大俠就唔清楚嘞，不過就肯定佢仲好有心囉。皆因外國行家披露，佢上周六喺家鄉第三次結婚，新任老婆仲要細佢25年㖭呀。

比利上周六同拍咗拖六年嘅日本人青木瑪希亞結婚，呢段亦係佢第三段婚姻；而路邊社消息話，佢哋早於80年代喺紐約一個派對上認識，但去到2008年先喺聖保羅一幢公寓嘅電梯撞番，過咗兩年再喺同一地點見番，似乎整定佢哋有緣，結果就喺埋一齊。比利等到2012年喺摩納哥一個足球頒獎典禮上，先正式公開佢同青木瑪希亞嘅關係；其實佢哋早就有結婚嘅打算，但因為比利早前身體有問題，試過八個月內三次入醫院，做前列腺同背脊手術，所以個婚期一改再改。
話時話，50歲嘅青木瑪希亞嫁畀一個大自己廿年嘅阿伯，有人認為佢係另有目的。雖然瑪希亞離過婚，不過佢嘅背景都幾好，爸爸係醫生，自己又係個好成功嘅生意人。點都好，希望比利「連中三元」後，之後唔會「大四喜」啦。