連同剛周日（16日）打風跑唔成馬，季初竟然出現了一個季內最長的空檔期，諗落都幾諷刺。餘下來的84次馬，請準備迎接密不透風的馬季。

因應上次日馬取消，今次周末（22日）賽事報名，頓時較對上四次踴躍得多，個別場合均有重心馬在陣，如馬迷今季仍未曾全力進攻的話，周末可嘗試發動首個攻勢。

回說小停火前的谷草夜賽，馬房以當晚（12日）起孖兼捧盃的姚本輝最省鏡。翻查今季姚廐出馬20匹，原來有10駒跑入前四名，亦即一半有獎金收，表現較上季同期明顯理想。

事實姚本輝今季亦有極強季初搶攻動力，皆因其子獲升為自己馬房副練，這對父子兵自然需要盡早交出成績建立口碑。

周六姚廐繼續強陣應戰，出馬達九匹之多，好幾駒今季更曾出賽熱身，包括出戰第六場三班泥地1200米的「鞍歌」，上季尾初跑同程即贏，兩星期前再擇勝途有心完成跨季孖寶。

奈何遇上「鐵胆王」及「雲信凡高」（已退役）早段互燒，一來增添「鞍歌」快跟的難度，二來造就了頭馬「上市動力」後發先至。

最終「鞍歌」能頂回一席亞軍絕不簡單，再一次反映本身泥戰能力強，周末續爭泥地1200米有力補中。

至於另一匹姚廐馬第三場「綠尚飛馳」，頭兩次出賽留住衝皆有吸睛走勢，不過上次備受熱捧反而一早擺前表現走樣，既然埋門試閘早段捉實拉士自動波湧上，今場可望回復適度留放，有機會取勝而回。