【李八方online】建制智庫撰選戰報告「重整旗鼓」 批西環「形式主義」局限發展
蘋果日報 2020/09/07 19:51
藍調李八方online建制智庫網上刊物
人人都話做政策研究，個個都做到政策研究㗎咩！之不過，做唔成研究都好，只要有條大水喉射住，研究有冇見地又如何？最緊要都係向有關方面交貨。
查實做得政策研究，都係想引導下輿論，尤其本來9月6日、即係噚日係立法會換屆選舉，之前嘅宣傳攻勢，當然關鍵。早喺今年6月26日，有一份盛傳係建制智庫出品嘅網上刊物 ——《藍調》面世。
顧名思義，都係藍營嘅調子，首份喺人大炮製嘅「港版國安法」前夕下出爐，主題係《和理非爭奪戰——後國安法時期的最新形勢分析》，但唔少分析文章都同原定立會選舉掛鈎，如講返修例事件和勇不分同建制區選大敗關聯，另有文章指建制派可以打咩牌。所謂見解，未見石破天驚。
《藍調》第一期喺6月底出版，當時國安法都未出爐。《藍調》截圖
《藍調》第二期喺7月16日出版，主題係同大家探討「二次回歸，一國兩制」呢個新命題，唔少得梗係藍營最鍾意聲稱反駁對「港版國安法」的指控。
唔知係咪有人通風報信呢？佢哋第三期（係呀，竟然仲出得第三期呀）喺7月31日出爐，配合北京打民主派初選主旋律，話要拆解戴耀廷「配票」把戲，又有文章提醒面對建制派選情嚴峻，應該如何迎戰？當中包括要團結，唔好有做票王票后心態喎。
倡建「中央廚房」主導輿論
結果政府最後借疫押後選舉，第四期喺8月17日出版嘅《藍調》就由恢復立會四個決心，講到全民檢測，話要「講好國家隊故事」，咪就係建制派而家做緊嘅嘢囉。
第四期就叫大家喺抗疫方面說好中國故事。《藍調》截圖
最新一期喺8月28日出版，主題係《關鍵的一年，建制陣營重整旗鼓策略》，單睇個名係咪好引人入勝？八方都睇過，除咗建議建制派加強服務齊心抗疫、推動選民登記，及以李梓敬同何君堯做賣點，推動多元網絡宣傳等阿媽係女人嘅建議，亦包括建立具備政策研究同心戰室功能嘅「中央廚房」主導輿論，以免對唔同議題流於各自表述。
最新一期教路大家善用民主派去留嘅矛盾做宣傳。《藍調》截圖
可圈可點嘅係，刊物另有文章提及中聯辦主事人調任頻仍，對港情未必熟悉，「長期側重形式主義，對建制陣營組織力量發展帶來局限」，因此佢哋嘅建議係：善用本地建制人才……搲撈味道甚濃噃……
最新一期亦叫中聯辦做好選舉協調。《藍調》截圖
刊物冇話邊度出品，建制圈內盛傳出自某位國家領導人催生嘅智庫，有連續睇過5期嘅人士對此「報告」不以為然，話當係提供多啲工作機會畀各界，未嘗唔係好事。八方留意到最新一期有提及，建制陣營應該喺留任同總辭問題上，善用矛盾，展開針對性宣佈，但啲配圖都係用咗網上圖片，真係hea咗少少喎……
-----------------------------
《蘋果》英文版免費試睇：了解更多
-----------------------------
《本土情味》結集《飲食男女》雜誌經典欄目「老字號」文章，記錄香港40家飲食老店的動人故事，見證香港飲食史的甜酸苦辣。即日起，於各大便利店及書報攤有售，並於 《蘋果日報》你的優惠 網上獨家發售！