呢排樓市新聞日日都係話減價,搞到好多啱啱入市嘅買家十五十六,再見到政府推出「租者置其屋計劃」,即係賣公屋,惟有忍痛撻定。中原助理營業董事許偉邦話,新界北區呢兩日就共有五宗撻定個案,預計陸續有嚟。
許偉邦講,呢班撻定嘅買家,喺早一個禮拜入市,重未簽正式買賣合約,見勢色唔對,諗諗吓決定撻定,好似粉嶺中心L座低層六室,成交價百四萬,買家撻定,損失五萬元。而上水旭埔苑D座高層六室,自由市場成交價一百萬,買家撻定及賠定,共損失三萬。
由於市況偏淡,市場上嘅放盤量大增,兩日多一成,至千一個,業主叫價調低三至五巴仙,埋枱重有得再減,實際減幅可達一成。
中原祝九倉通殺
澳門金沙賭場開業,過萬人爭相過江「搏殺」,場面震撼。記得兩年前九月,九龍倉以美國拉斯維加斯賭場做包裝概念嘅深井碧堤半島,開賣場面一樣墟冚,淡市中首晚內購賣出幾百伙。
中原地產噚日同發展商搞優惠促銷,雖然九倉下半年至開賣第二期,但地產代理就昅到實,做定銷售預備工夫。中原噚日重送咗副巨型無敵「同花順」啤牌,畀九倉助理董事黃光耀,寓意呢個樓盤全行「通殺」,無人能及。