正當港人關注人大再次釋法之際，政府噚日下晝四點半，突然發出採訪邀請，話特首梁振英會同財爺等財金官員同場開記招講辣招，令唔少傳媒都質疑梁振英想轉移視線，雖然CY同鬍鬚曾同場講辣招，但兩個人一樣俾人覺得貌合神離，鬍鬚曾係CY主持大局下，仲要高舉食指出晒聲，先有得答記者問題。
今次記招都有別過去三次政府辣招記者會，之前只有財爺、運房局局長張炳良及政策官員解畫，噚日CY同發展局局長陳茂波都罕有出席。

之後有人問政府消息人士，CY現身係咪同特首選舉有關，政府消息人士話，今次加辣時機主要考慮全球經濟因素，與政府換屆無關。
而財爺同CY入場時，就好明顯保持距離，最遠相距8個身位，而CY一開場，即自行發言3分鐘，其後更無視身旁財爺，直接話先請張炳良講「加辣」措施內容，然後請陳茂波講公營房屋問題！
財爺唔知係咪見到有人冇預佢講嘢，即時向CY高舉食指，當住一眾記者面前問CY：「我可唔可以補充一句？」先獲得近3分鐘的發言機會。有人問財爺點睇釋法，以及民調顯示自己民望高過CY好多時，財爺都要喺記者再三追問下，先答：「我哋（自己與CY）答案一樣」。記招結束後，財爺明顯等梁振英起步後先離座，記招上被CY安排狂答問題的張炳良，就向財爺揮手，再密斟下離開。

李八方
mailto:[email protected]