禽流感備受關注，政府呼籲市民盡量避免接觸野生禽鳥；但有跑馬地居民投訴，鄰居經常於寓所露台擺放飼料，吸引大量雀鳥聚集；居民擔心雀鳥傳播細菌，向食環署投訴，卻因私人地方而難以干預；居民直斥政府制度僵化，並未因應實際環境而作相應措施。

居於跑馬地冬青道的許小姐坦言感到擔憂，「佢哋日日都引埋咁多野雀嚟，𠵱家全球都受禽流感威脅，我哋住附近嘅，唔驚就假！」
許小姐向記者呻道，冬青道一大廈住有一對外籍夫婦，他們一向喜歡擺放飼料於寓所露台，吸引大批雀鳥往覓食。

恐雀鳥會傳播細菌
許小姐稱，該對夫婦每天都餵飼雀鳥，有時是雀粟、有時是水果，令雀鳥每每「流連忘返」；這情況已維持六、七年。
「對夫婦可能係出於愛心，況且以前都未有事發生，所以大家都唔會干涉，但𠵱家政府都宣傳話盡量唔好接觸野生禽鳥，咁即係有危險性啦；我哋就梗係唔想有咁多野雀飛埋嚟啦，好易傳播細菌㗎！」
自言備受困擾的許小姐指出，她曾向食物環境衞生署反映，無奈食環署稱，他們只可處理公眾地方的相關個案，惟私人地方卻無權干預。
「法例係死嘅，人係生嘅；點解政府唔因應番實際嘅情況去彈性處理呢？以前未發現到有禽流感，條例點訂都唔太大影響，但𠵱家咁多新嘅病菌出現，政府係咪都應該相應作出（條例）修訂呢？」
直斥政府政策僵化的許小姐不滿道，上址附近設有小學及幼稚園，「我哋大人都可能識得避忌，但小朋友年幼無知，可能會去接觸啲雀鳥；雖然唔一定會因此感染禽流感，但𠵱家非常時期，乜嘢可能性都唔可以排除。我哋只係希望政府可以諗啲相關嘅對策，減低任何感染嘅機會啫！」