韓國Mnet新一季選秀節目《PRODUCE 48》噚日播出最後一集，跟日本AKB48合作，於96名練習生中選出12人出道，而喺《PRODUCE 101》第一、二季而組成限定組合嘅I.O.I及Wanna One成員噚日亦有見證後輩嘅誕生。

經過一輪比賽後，最終由15嘅台韓混血兒張元英踢走大熱、喺「AKB人氣總選舉」得第三名嘅宮脇咲良奪得冠軍寶座，宮脇咲良屈居第二名，排第三至第12位分別為曹柔理、崔藝娜、安宥真、矢吹奈子、權恩菲、姜惠元、本田仁美、金彩元、金珉周及李彩燕，12人將以女團「IZONE」出道。

對於撼贏一眾對手以33萬得票奪冠，噚日15歲牛一嘅張元英得獎時一臉難以置信，致辭時含淚話：「其實今天係我生日，真係好棒嘅禮物，非常感謝，冇國民製作人（粉絲）我一定無法站喺呢個位子。」

大熱倒灶嘅宮脇咲良就向所有支持嘅粉絲表達感謝：「這都係託國民製作人嘅福，雖然我仲有好多不成熟嘅地方，但我會更加努力。」

最後12名出道嘅李彩燕興奮得痛哭跪地，佢父母喺台下亦激動得落淚。而上周18名嘅StoneMusic練習生曹柔理一躍至第三名出道，佢開心得哭到蹲地。

精選韓流，喺晒《娛果》
http://fb.com/appledailyent