要Paper唔要Rubber 紙紮樂隊
近年BandSound又Hit起!無論你喜歡Mr.定RubberBand,但點都唔及今日介紹PaperBand咁盞鬼!紙紮樂器你見過未?留番農曆7月14先介紹?唔好搞錯!入咗電池、手指一彈,真係嘈到坼天o架!佢仲有AMP同Drum,約埋三五知己,翻轉睡房變Band房,好過孤伶伶打機啦!
記者:陳國輝
攝影:黃子偉
Model:
[email protected]查詢:JCShop(31022783)
呢批紙紮樂器有個朵——PaperJamz!一比一Size,七成係紙,三成係膠,加埋成支結他都唔及一部單反咁重,揹喺身行走MK,扮一晚天涯歌女,睇怕都唔覺攰!
結他柄上嘅白點,其實全部係輕觸感應嘅Chord,只要是但㩒一粒掣,彈出嚟嘅音色都唔同,效果真係拍得住電結他、嘈到坼天!
更過癮係,你除咗可以自彈自唱,仲內置埋幾首Rock爆嘅鬼佬音樂,你可以一邊掃Chord,一邊Jam歌,但千祈唔好玩得太High,一嘢扑佢落地,點講都係紙做嘛!
要夾Band,得支電結他似乎太齋!PaperJamz系列仲有個紙紮Amplifier!簡單理解你可當佢係外置喇叭,3.5mm插駁電結他或MP3機都得,更重要係個Look勁有Feel,好想講聲Rock'n'Roll!
呢個紙鼓外觀手工較粗糙!佢將所有敲擊樂器合而為一,睇落同塊滑板差唔多;不過提提大家,玩時咪用鼓棍,始終係紙嘛!直情用手敲落去就發聲,玩落好有非洲鼓風味。好彩!音色模仿得幾似,如果能同一時間搵兩部電結他一齊夾Band,呢個組合真係無敵喇!