工作狂的莫文蔚（Karen)與德國籍丈夫Johannes結婚將近4年，婚後Karen在工作上依然拼搏，兩公婆經常分隔異地，今年9月她又將舉行「看看世界巡迴演唱會」，至少半年時間冇得見面，Karen說：「好驚呀！演唱會喺香港綵排，一開始就要每個禮拜表演，所以應該有半年時間番唔到英國，都唔知點算好，要老公諗吓辦法。」

Karen與老公經常分隔兩地，但她就喜歡小別勝新婚的感覺，回到英國就變做平凡人妻，萬能的丈夫更為愛妻下廚煮愛心餐，「通常都係老公煮畀我吃食，佢鍾意煮意大利菜，喺英國就過好普通嘅二人世界，老公放工後就一齊買餸返屋企煮飯，得閒睇吓舞台劇，過好普通嘅生活。」

事業上Karen是女強人，在丈夫面前可會變回小鳥依人？「哈哈，喺屋企我都係女強人，老公遷就我多啲，我唔係要話晒事，兩公婆有商有量，我哋實在太了解對方嘅性格，由17歲識佢，佢好識點handle我。」問Karen會給自己做太太角色多少分數？她二話不說：「梗係爆燈啦！」

近年圈中女星多嫁老外，包括莫文蔚的好友梁詠琪，還有李玟、周汶錡和官恩娜的另一半都是外國人，為何她們不揀港男嫁老外？Karen說：「其實世界社會一路喺度變，唔單只係圈中藝人，其實世界已經越來越冇咩界限，你去接觸唔同地方嘅人同文化，或者去唔同地方工作嘅機會都多咗，唔同上一代，所以同來自唔同地方嘅人結婚一啲都唔出奇。」

更多時尚新聞，即上： http://add.appledaily.com