噚日應承過大家，今日講平時非常脫節，「慢半拍」嘅微軟Microsoft，點樣喺互聯網令到乜嘢資訊都被複製、發放嘅情況下，卒之做啲孫柏文覺得好好嘅應變去搵錢。不過，今日我睇到新聞，講我哋特區裏面有一啲唔面對呢個現實嘅人「有嘢搞」，所以要聽日先至講微軟。
呢幾日我都講過今時今日喺花旗國嘅公司，點樣成功面對互聯網改變營商環境嘅挑戰。例如好耐以前，一份報紙想賺錢，辦法都非常直接，就係只要印啲讀者想睇嘅資訊，跟住攞出街賣，就可以賺錢。或者以前電腦軟件公司，佢哋只要做一個好多人想用嘅軟件，跟住攞出街賣就可以賺錢。
互聯網對傳統傳媒、科技公司有兩個大挑戰。第一，就係有互聯網嘅興起，乜嘢資訊，例如文章、短片、音樂、電腦軟件等等，都可以被街外人免費、完全、無限地複製、發放，有如一部毋須運作成本嘅影印機。正當任何資訊都可以被複製，傳統嘅搵錢方法就行唔通。因為，只要你一製造資訊，就會被人複製同發放。

第二，就係互聯網嘅興起，令任何人發放自己製造嘅資訊都容易咗好多。以前想發表自己嘅文章，要先將文章送去報紙度，跟着祈禱希望被印出來。今時今日，阿豬、阿狗、阿貓都可以將自拍短片、文章、音樂用互聯網同大家公開咁分享。對於傳統公司來說，有啲阿豬、阿狗、阿貓自發咁做嘅製作，有時候比起公司做得更好。
不過，當年設計互聯網嘅時候，係特登希望令到用網發表嘅製作，盡量容易被其他人利用，繼而再將製作增值。一樣已經差唔多銷聲匿迹嘅產品，就最能凸顯呢個互聯網對傳統公司嘅威脅。呢個產品，就係好出名嘅百科全書Britannica，今時今日仲有邊個學生用Britannica做報告？今時今日啲學生做報告，第一站一定係wikipedia。
大家可能會問：「將製作增值？即係話侵犯版權啦？點解當年設計互聯網嘅時候，要特登設計到可以咁容易侵犯其他人嘅製作呢？」我諗係因為當年設計互聯網，特別係大家都熟悉嘅worldwideweb，係設計畀大學裏面啲人用嚟發表論文。一個學者發表完論文之後，另一個學者又可以研究吓論文裏面嘅理論，加以發揚光大，繼而再增值。

不過無可否認，有啲公司係唔肯面對互聯網帶來嘅「新現實」，覺得仲可以保持以前搵錢模式。覺得互聯網帶來嘅水災，係一場始終都會雨過天青嘅風暴，而唔係「溫室效應、淹沒全球」嘅水災。我哋特區裏面最「唔肯面對現實」嘅代表，就一定係噚日又再次喊打喊殺嘅電影公司，佢哋又再高聲呼叫「反盜版、反盜版！」，話要拉人。今日，我希望用隻金手指去篤醒佢哋，同佢哋講句：「接受現實，再諗其他方法搵錢！」
孫柏文