今季重返愛華頓嘅朗尼近排好唔得閒，佢早排因為醉駕被捕又疑似偷食，搞到老婆高蓮鬧離婚，點知啱啱有單懷疑謀殺又扯到去同朗尼有關。話說日前當地警方邀請咗一名女子，就一單謀殺案接受調查，而佢就係喺2009年高蓮大肚期間，同朗尼玩過3P、當時做妓女嘅珍妮湯遜（Jenny Thompson），結果明明唔關事嘅朗尼又要見報啦！

據英國《太陽報》喺星期一報道，曾經同朗尼以及Helen Wood玩過3P，現年28歲嘅珍妮，因為有個48歲男人David Molloy參加過喺由珍妮父母擁有嘅大宅開嘅party之後死咗，所以要接受調查呢單懷疑謀殺案嘅警察問話，仲話珍妮父母噚晚就喺離開事發現場唔夠一哩、價值50萬鎊嘅豪宅入面安慰珍妮。有社交常客話「唔清楚David係點死嘅，但對珍妮就好大打擊，佢非常之唔開心。」

據報道，警方係因為一宗報稱打鬥案而去到大宅進行調查，當時珍妮嘅好朋友Zoe Percival喺屋度搞緊生日party，警察拘捕咗懷疑破壞安寧嘅David，不過佢喺警車上覺得唔舒服，之後仲喺醫院死咗！警方其後返咗去位於保頓嘅大宅，拘捕咗一個涉嫌謀殺嘅34歲男子，至於珍妮同Zoe就冇被視為疑犯嘅。報道話，相信間屋係Zoe向Jenny父母租嘅，而Zoe噚日仍然受到警方保護。