周二（1月1日）元旦日舉行2019年首次賽事，講到最喜歡在新年攞頭威之練馬師，竟然係霍利時。這位南非裔練馬師在對上三季元旦賽日分別勝出「春意溢然」（已退役）、「搖錢樹」及「勇晉神駒」。

今戰霍利時共派六駒上陣，當中一對配上韋達角逐田草1200米之「福穎」及「老實人」，最有機會為時廐打響新一年頭炮。

第三場四班1200米，「福穎」近三次角逐田草1200米均入位，包括今季首仗獲季軍，其後三仗轉跑谷草及泥地而敗，今仗終於重返強到路程，評54分比季初入位時仲要六分，可望贏馬反彈。

第六場三班1200米，「老實人」前仗在麥菲文離港前最後一戰贏馬，成為練者之送行馬，而且所造時間極佳，締速比當日三班頭馬仲要快，難怪不少蹄下敗將再戰均交出表現。

「老實人」上仗轉投霍利時馬房復出，雖然蝕位較多仍後追接近，今仗回配贏馬拍檔十三少韋達執韁，有力重溫贏馬滋味。