當年今日

阿媽是超人 - 陳也

蘋果日報 2010/03/04 00:00


今年報名參加渣打馬拉松的六萬名額中,有七千七人臨時縮沙沒落場。這六萬個跑手中,有無師奶?那七千七個棄權者,假如全部是為了當孩子陪跑的師奶,肯定沒有一個會打退堂鼓,肯定會逆反專家意見,雖然腳痛抽筋濕滯作嘔,都會死頂落去。陪孩子跑,陪命都是心甘命抵。
朋友介紹上網睇YouTube一條動畫,叫做「我阿媽係外星人」,說「不是麥兜『我要回家』那種,你一定要睇,會喜歡的。」本土創作,騎騎呢呢但非常清新,全片只有一個主題,阿媽不在了,阿仔對住空屋悵悵,忽然大悟,噢阿媽原來你真係我偶像,原來你是外星人,超人!超人阿媽partⅡ再發功,這個鬈毛阿媽,背住發高燒的阿仔去醫院睇急症,由朝早出門到黃昏回家,行足42.195公里甚至唔止,就在安抵家門樓下公屋群的上空,目睹燦然如鹹蛋黃的日落。這是任何一個阿仔不能忘記的日落,因為是阿媽溫柔地背着你,用一雙長滿厚繭的手牢牢地托住你的屁股,讓你腳不落地,拖鞋一甩一甩,騰出一雙小手,在阿媽大汗濕透的背脊上,小口小口啜着暖笠笠的麥精維他奶。
阿媽在生時你不會覺得她是超人,你很早就借機會跑出去,不想阿媽這個長氣袋黐身。直至一天,阿媽去了外星,你在征服完三橋三隧終點在望的最後半公里,心裏突然一揪,倒地悲聲痛哭。