曾志偉、余安安、黎瑞恩、苗僑偉同戚美珍等今日去到澳門參與慈善高爾夫球賽，噚日余文樂同王棠芸突然宣佈結婚，告別單身，步入人生新嘅一頁。(新聞連結： http://bit.ly/2BAyVuG )

曾經同樂仔合作嘅志偉笑笑口話自己噚晚知道：「好啱時間，係時候定性專心工作，喺佢事業最好同上緊時間，《一念無明》之後，好多人都問點搵佢拍戲，經我手畀佢劇本都有十個，男人有家之後就可以專心喺事業上衝刺。」有指樂仔係雙喜臨門，志偉笑住話：「咁犀利，證明係負責任男人。」

志偉指未見過樂嫂王棠芸，佢話：「之前佢同我講又拍拖，我話定咗先同我講，後生仔車輪轉，費事認，我同個仔都咁講。」志偉亦漏口風恨再飲新抱茶，佢亦以過來人身份指男人有家庭後，壞習慣會慢慢改掉，而事業上嘅成就，就係喺呢刻斷定出嚟。

黎瑞恩(小恩子)代表香港藝人高爾夫協會到來支持，佢話差唔多冇打九個月，近期開始忙於參與各個慈善賽，可能因為即將入錄音室錄歌兼要準備演唱會，搞到精神壓力大，所以近日出現失眠情況：「好多朋友同我心理輔導，叫我諗番想唱歌初衷，係開心唱歌，但我一去做就太認真。」正如網上直播唱歌，小恩子都好大壓力擔心失準。嚟緊聖誕會陪愛女去韓國，因為阿女想學韓文兼報班，小恩子指愛女對語言好有興趣，之前又學過泰文。

更多娛聞，喺晒《娛果》
http://fb.com/appledailyent