八方噚日寫前特首梁振英一直冇係fb寫撐送中撐林鄭，點知689真係咁「聽話」，噚日一早係fb發文評論送中惡法，不過佢就疑似向林鄭「踩多腳」，直指送中惡法引起嘅風波，「重創香港在國外的聲譽」，難得同民主派陣營，連成一線，唔通真係好似八方噚日咁講，佢想出山做林鄭餘下任期。

叫商會組團出訪

689噚日一早九點左右就出文，第一句就寫「修訂《逃犯條例》引起嘅風波，重創香港在國外的聲譽」，根本明寸娥特，之後佢話喎，對外嘅解釋說明工作，不能僅靠中國駐外嘅使領館，不能單靠「力量單薄」的香港特區經貿辦事處，更不能靠外國傳媒，佢建議香港各大商會馬上組團連續出訪，話各商會喺特區政府作出讓步後接受修改方案，對整件事嘅來龍去脈最為清楚，所以最有發言權喎。

其實國際社會對送中惡法最關心係差人用過度暴力打示威者、娥特會唔會下台，已經冇乜人關心一條北京、港府睇怕唔敢再推嘅惡法，689叫人去解話，即係有心玩班商會，叫佢哋做人靶去外國俾人問到口啞啞！而且八方唔知有幾多個商會會理呢位過氣特首意見，只知道唔少「梁粉」都覺得689點會唔知翻閹無望？咁活躍都係刷存在感。

李八方