如果呢一刻要你揀政府最做到嘢嘅官，你九成九會揀衞生防護中心傳染病處主任張竹君，其他人冇可能揀得落手。皆因只有佢每日風雨不改，每日準時4點半出嚟匯報世紀疫戰嘅戰況。今日有記者半開玩笑咁問佢幾耐冇放過假、點解冇其他人分擔到佢工作，佢都好得體咁答，佢兩個老細其實工時更長，相比之下佢算好啲喎﹗

但有眼嘅人都知，張竹君只係講門面嘢，唔敢批評老細啫。佢喺衞生署基本上只有兩個上司，就係防護中心總監黃加慶、衞生署署長陳漢儀。佢兩位鬥「神隱」鬥咗兩個月喇，最近3個星期黃加慶先認輸，每星期揀一日「客串」式現身記者會；陳漢儀就堅持同7.21嘅popo一樣，no show唔見人。

講返轉頭，張竹君連續兩個幾月主持記者會嘅「成績」，應該破晒近年政府官員紀錄，連例牌坐佢隔籬嘅醫管局官員都頂唔住，要每星期換人，認真犀利。大家關心張醫生之餘，都可以知多啲佢嘅背景：1991年港大醫學院畢業、2004年成為社會醫學院院士，擁有公共衞生醫學專科資格，服務衞生署超過20年，已婚。

-----------------------------
【武漢肺炎】專頁
全民自救 抗疫資訊盡在《蘋果》
-----------------------------
無懼警暴 學懂自救
《抗暴之戰●法例須知》讀果 上架