法國有個姓勒姬的七十三歲婆婆，周身充滿俠義細胞和正能量，食飽飯最喜歡參加遊行示威，幾十年來孜孜不倦，彪炳業績假如落在法治比較飄移的國度，不會不被執法者定性為滋事份子，理直氣壯列入黑名單，再義憤填膺，都難逃被扣上尋釁的大帽子。上星期她轟轟烈烈登上頭條，成為舉國矚目的新聞人物，事關在南部如常搖旗吶喊的時候，疑似和該死的警察發生肢體磨擦，倒地受傷急召白車，那個小鮮肉總統不知道是不是為了熱衷和近日訪法的習大帝接軌，狂煲宮鬥劇做功課太過入心入肺，公開祝勒姬女士早日康復之餘，忽然奸妃上身，口痕加了一句「啲老人家明知自己弱不禁風，好心就咪去容易受傷嘅地方獻世啦。」嘩哈哈哈，這簡直示範何謂小不忍則亂大謀，講少句冇人話你啞㗎，稍留意厲害國動態的觀察家都醒水，任何具「碰瓷」潛質的場面，精嘅就唔好行咁埋，結果當然遭左右陣營聯手狂插，涼薄之名又再滿天飛。

被美色所迷而偏幫馬克龍的擁躉，客觀指出婆婆確實有攞嚟賤嫌疑，不應該濫用自由，罔顧遊行禁區，跑進去手舞足蹈伸張正義；家庭觀念爆棚的口痕友又話，小馬不過愛民如命，當正老百姓屋企人，邊個冇試過畀唔生性長者激到札札跳，情急之下將關懷化為責備？然而就算鐵證如山，都恐怕洗脫不了「不敬老」死罪，這可比包庇私人保鏢公餘施展拳腳更具殺傷力，何況大家還未忘記，不久前有個失業人士抱怨寫了幾百封求職信石沉大海，總統先生居然批評「寫乜信吖，落街搵啦懶鬼」，堅離地指數媲美瑪麗皇后的「冇麵包食，點解唔食蛋糕」。