城規會之前漠視民意，決定將中環海濱休憩用地改劃為軍事用地，仲畀埋解放軍起軍事碼頭，𠵱家仲等緊行政長官會同行政會議做最後決定。上月底八方有個朋友仔，趁中環海濱未割讓畀解放軍前喺中環海濱跑步，點知發現有持槍保安喺海濱嘅地盤外面駐守，仲封住條路，令佢跑唔到去灣仔。佢見咁恐怖，梗喺問吓保安員乜料啦，點知個保安答佢呢度係軍事用地，市民唔可以隨便經過，有乜投訴就問政府喎！
嘩！聽完佢轉述，八方都嚇死，唔通行會未做最後決定，解放軍已經無法無天到即時搵保安駐守？容乜易擦槍走火唔小心傷到其他無辜市民？

借畀外國軍艦登岸

八方即時去中環海濱刺探軍情，好彩只係虛驚一場。原來朋友仔搞錯地盤，佢見到持槍保安嘅地盤，係屬於土木工程拓展署，𠵱家做緊中環海濱設施工程，唔係軍事碼頭位置。但持槍咁大件事，八方都問吓土木工程拓展署乜事先，佢哋回覆話，因為受到灣仔發展計劃第二期工程影響，所以分域碼頭沿用嘅登岸設施已經停用，署方喺地盤範圍提供咗臨時登岸梯級畀其他使用者使用。
政府又話上月底曾有外國軍艦訪港，所以借出地盤個臨時登岸梯級；負責嘅保安公司就證實，持槍保安只係咁啱做緊特別任務、唔係長期駐守，又講明保安員持槍只係配合工作需要，得到警務處允許咁話。其實中環軍用碼頭咁多市民反對，政府又要逆民意而行，遲啲有解放軍駐守都唔出奇囉！

李八方
mailto:[email protected]