近日網上流傳一則潮文，將女人大限設定在27歲，中女危機年齡由30歲大幅推前，進一步嚇窒不少港女。入行已十二年的吳雨霏(Kary)，正值黃金27，去年把長髮剪掉的她外貌越見成熟，但對大限之說處之泰然：「反而會好期待自己到30歲會變成一個點樣嘅吳雨霏！」
撰文：趙潔恆
攝影：周樂恒

根據「27歲定律」，Kary正在女人一生巔峯，坦然自己性格一向被動，但今年突然很想在事業上找回鬥心，「我仲有好多嘢要去學、要去經歷。社會上界定咗女人喺20幾歲最靚，我又唔係咁睇，唔應該只係睇外表，好多成功嘅女人，都花好多年去畀心機建立事業，又好獨立，我覺得咁樣嘅女人先係最吸引人，所以我都好期待自己30歲會變成點。」很多女人都抗拒變老，Kary反而表現得相當豁達，她卻說自己也有表現得不成熟的時候，而且很易受人影響。「人吔講一句，好或者唔好嘅comment，我都好易動搖，畀咗好多壓力自己。後來我都有自我反省，同自己講：『唔好理人哋講咩，最緊要自己做得開心。』𠵱家慢慢fine tune緊。我覺得自己都獨立咗好多，入行時太細個會慣咗依賴人，𠵱家會識諗啲。做完嘢自己一個人返屋企，享受靜落嚟，消化吓每日做過嘅事，聽過嘅意見。」

去年與余文樂和平分手，近日因為男方和混血女模Ase Wang傳出緋聞，又無可避免牽扯到Kary身上。對於這段舊戀情，Kary不欲再談，面對感情空窗期，卻坦率流露心急如焚的一面：「坦白講，我都享受自己一個，不過如果有男朋友都幾好，得閒就去拍吓拖，我諗每個女仔都會希望咁樣，空窗期最好就唔好太耐啦！」 對上一段愛情曝光率如此高，可會希望下一個男朋友是圈外人？「其實自己入行嘅時候都同自己講，唔想搵番同一工作環境嘅一個partner，因為工作已經好辛苦，如果經常因為工作接觸到，我又唔太想。我最好嘅朋友又或者多年嘅好姊妹都係圈外人，所以有得揀我都會揀圈外人。」

談到心目中理想的男朋友要具備甚麼條件，有些女生心中或許有一張清單，但Kary的卻很簡單：「又冇特定類型，好似好行貨但又好真，真係要click到對方，傾得埋，就算外形幾好，幾高大幾靚仔都好，可能都只係一剎那嘅火花，如果要同一個人有long term的連繫，真係要了解同溝通。我其實都係一個幾要空間嘅人，日日見係咪最好呢？我又覺得未必係。唔一定要糖黐豆，最緊要有mutual respect(互相尊重)。」

Kary在15歲時入行成為Cookies一員，當年最紅的鄧麗欣與傅穎在本地樂壇近乎銷聲匿迹，反而Kary近幾年越戰越勇，年年出碟兼在樂壇頒獎禮中佔一席位。去年推出《State of Mind》專輯更自己寫歌又任監製，造型方面也搏到盡，幾乎半裸影大碟封面。「好多嘢都想試，你見我咁樣影封面，其實真係無乜底線，咁大膽去試唔同styling，因為我覺得做音樂其實不單止音樂本身，如果加埋visual，效果就可以更加強勁。」
將在5月出新碟，首支主打歌《逆轉》MV遠赴印尼拍攝，造型服飾更找來Lady GaGa都曾着過的新銳設計師Tex Saverio，高級訂製的設計前衞有型。除了形象上花了不少心思，Kary今次也將重點放在歌唱技巧上：「我近排都不斷做vocal嘅練習，練唔同嘅scale(音階)，希望在唱歌方面唔同啲。」如此努力練唱歌，又有沒有想過上《我是歌手》這類鬥唱節目?「我又冇諗過，可能未必會，我覺得《我是歌手》入面啲歌手嘅聲線實在太犀利，佢哋嘅聲線好強烈，我覺得自己嘅風格同佢哋唔係好啱，但係you never know。」
在娛樂圈打滾的日子不算短，Kary當然也經歷過迷失的時候，「出面啲人睇娛樂圈會覺得好glamorous，做歌手好似好風光，現實根本唔係呢回事。試過等咗年半都冇碟出，都幾難受，今日唔知聽日事。呢個時候就要好有EQ，同埋堅持，問自己點解要繼續，係因為自己真係好鍾意做音樂，同唱片公司一樣都有抱負，想繼續做好啲。」

髮型：Kate Shek of Hair Culture
化妝：Hubei Har of Atelier d'Arris

Kary向來不吝嗇行性感，在台上總是衣着大膽，私下也熱愛時裝。「I love shoes！我鍾意鞋多過手袋，我襯衫好奇怪，會諗咗着邊對鞋先，由腳襯番上去。我最愛型格簡約嘅style，屋企有好多件tank top，對衫嘅質地特別有要求。」

更多精采時尚內容，盡在 http://add.appledaily.com。