趙崇基執導、游學修、廖子妤同盧鎮業主演嘅電影《中英街1號》，先後參加過日本大阪亞洲電影節及意大利鳥甸尼遠東電影節，喺大阪仲贏咗最優秀作品大賞。

之前《中英街1號》喺香港一直上映無期，該片揚威海外之後，終於露出曙光，本月舉行了三場優先場，好快已經賣晒飛。趙崇基導演一直擔心冇戲院敢排片嘅問題，最後都解決咗。

另一喜訊係，《中英街1號》已經安排咗本月31日在港上映，雖然檔期唔係特別好，始終可以同觀眾見到面。

噚日套戲喺銅鑼灣舉行慶功，台前幕後連嘉賓有過百人出席，陶傑、黎小田，仲有藝發局副主席李偉民。趙崇基今日接受《蘋果》電話訪問，就稱唔係因為攞獎先至慶功：「都想借個機會多謝一班台前幕後工作人員，好多冇收錢咁幫我手。依家可以安排到5月31日上，好似發緊夢咁。」

趙崇基又表示，《中英街1號》在大阪奪獎，且晉身外國電影節，加上三場優先場都好快爆晒，院商覺得有可為，所以肯排片上映，現在暫定有6間戲院上，趙崇基謂希望貴精不貴多。

《中英街1號》故事涉及六七暴動，及香港社會運動（戲中虛擬2019年再發生「菜園村」事件翻版），引發不少爭議及傳聞，例名有傳該片每場優先場都被秒殺，係因為有啲「有心人」用唔想普羅市民睇到套戲，所以極速買晒啲飛。

對於「包場」傳聞，趙崇基導演表示未有所聞：「其實每場優先場我都會出席，每次散場後，都見到唔同年齡層嘅人，有上年紀嘅，仲有好多後生仔，唔似嚟自同一個族群，所以我相信呢個傳聞唔可信。」