歐錦棠同陳凱琳今日喺銅鑼灣出席航空公司HK Express活動，該公司將一班客機命名為「小龍」，藉此向李小龍致敬。

歐錦棠係李小龍嘅超級Fans，雖然前日為音樂劇《馬丁路德》客串演出時，不慎跌斷左手，但佢仍現身支持，包住左手嘅阿棠，即場示範單手耍雙節棍，見佢耍得揮灑自如，之後仲教陳凱琳擺李小龍甫士。問佢耍雙節棍有冇整親？佢話：「唔會，雙節棍係我身體嘅一部份，我9歲已經開始玩，當時用地拖棍自製，整爛屋企好多燈，又打到自己起咗好多個瘤。」

歐錦棠講到隻左手嘅情況：「前日出事，噚日睇咗骨科，照咗冇碎骨，唔使做手術，醫生幫我換咗玻璃纖維托，輕身啲，3個星期後可以拆，之後再做物理治療。」對下個月公演嘅《男女PK大作戰（激笑版）》有冇影響？阿棠表示噚日已經開始綵排，好彩唔多動作，不過原本要做一個打筋斗動作，o依家要cut，噚日同聽日本身都要拍廣告，o依家要押後。

喺生活上，阿棠笑指自己好似住緊安老院，佢笑住話：「沖涼要靠老婆，我鍾意着窄腳褲，又係靠老婆，每日佢幫兩隻貓清潔完之後，跟住幫我抹，今次教訓我平時要對老婆好，男人污糟邋遢唔緊要！但唔可以唔着褲出街。」

陳凱琳透露嗲哋係李小龍迷，儲咗好多李小龍嘅物品，佢話：「我細個嘅時候，爹哋唔會俾我搞佢啲嘢，因為小朋友唔知道有幾珍貴。」講到佢噚晚同好友賴慰玲食飯，陳凱琳話：「噚晚一齊煮咗泰式晚餐，慶祝下啦，佢年尾都生得。」男友鄭嘉穎係咪第一次出席朋友飯聚？佢話唔係，嘉穎同佢班朋友都好熟。佢指賴慰玲向來都大食，不過比平時食得更多，但係要戒口，所以煮泰式晚餐時唔會太辣。陳凱琳雖然唔肯透露賴慰玲嘅BB性別，但佢表示已經講好做契媽，仲會幫手改英文名。