今日起，馬雲除咗係阿里巴巴主席外，仲有一個身份，就是當代畫家。何解？皆因佢同內地著名畫家曾梵志合作畫咗一幅好似由外太空望向地球的油畫，名為《桃花源》，噚日就交畀蘇富比拍賣，成交價高達4,220萬元。在拍賣會上，成交價僅次兩位國際級大師草間彌生《NO. RED B》（成交價5,452萬元）及吳冠中《小桃紅》（成交價4,444萬元）。

所得款項盡捐旗下基金

對凡夫俗子來說，藝術嘅嘢真係識條鐵咩！不過拍賣行都低估咗馬雲嘅號召力，最初估值150萬元至250萬元之間。噚日蘇富比舉行嘅現當代亞洲藝術拍賣會，經過大約30次叫價後，最終以4,220萬元成交，拍賣行專家足足低估咗96%呀！
《桃花源》係馬雲嘅處女油畫，旨在呼籲人們保護環境，拍賣所得款項全數捐予他有份成立的「桃花源生態保護基金會」。佢噚日就係走咗去深圳騰訊（700）總部，參加桃花源生態保護基金會的董事會議，同聯席主席、騰訊主席馬化騰及一班內地企業家，齊齊發表意見提倡減少污染。有咗今次賣畫所得的近半億資金，相信基金會好快會為社會作出貢獻。
內地IT界中以馬雲最具藝術細胞，自創「馬體墨寶」，去年將其中一幅墨寶放上淘寶拍賣，有人批評嗰幅畫唔似寫字，而係不斷畫圓圈，睇落好似「Oreo麥旋風」，但最終成交價都有242萬元人民幣（約295萬港元）。

李華華
mailto:[email protected]