【蘋果動搞作】古巨基早前跟「蘋果動搞作」為一男三女fans製造驚喜。整個過程當問fans對基仔感想時，基仔就匿喺隔籬房全程直擊仲忍唔住偷笑。
第一位fans Alan話鍾意基仔已經二十幾年，最記得基仔呼籲將買禮物嘅錢用嚟幫助有需要嘅人，Alan就助養咗兩位小朋友到𠵱家。當基仔現身時，Alan嚇到呆咗，自拍時，Alan媽電話到，百厭嘅基仔代接話：「媽媽？我今日有少少感冒，你可唔可以幫我買點數卡呀？」醒目嘅Alan媽冇上當，就算基仔表露身份，Alan媽都唔信，最後要基仔影相確認。

鍾意老婆內在美

第二位受訪者Stella有教自閉症嘅小朋友，佢仲會袋住基仔本《IQ王》喺身，可以畀小朋友睇。訪問完成後，Stella見到基仔突然現身，即時又驚又喜，仲忍唔住喊咗出嚟，基仔見狀就攬實對方以示安慰，仲讚Stella係位好老師。
另外，有位fans文慧就口快快話基仔老婆Lorraine「唔靚」，不過佢話：「但我覺得愛情唔係用靚唔靚嚟衡量，係講點維繫。」基仔出現自然令到文慧好開心，基仔講出對太太嘅心底話：「古太聽到那些人話佢唔靚呢‥‥‥佢真係唔夠靚，但係我鍾意佢內在美。」
採訪：倩宜、吉吉　
攝影：陳俊強
場地提供：Mustard Seed