Samsung新一代摺機Z Fold2之前在網上舉行了獨立發佈會，讓更多功能細節曝光，Gadget Guy亦已第一時間實試新機，不過香港版發售詳情就未有公開。而這功能強勁、比初代更完善的新摺機就剛剛再舉行了香港網上發佈會，新機比上代Galaxy Fold稍貴一千，開價$16,998（512GB）。雖然如此，但新機正面及摺合屏幕都更大，加上支援5G，貴上代少少都算合理。當然喇，一部電話賣到萬七蚊，記者都唔會話係「抵玩」咁離地，不過如果你能力能負擔得起的話，可以玩到品牌甚至是電話界中最新技術的集結，其實也是合理和令人興奮的。又如果你真的能負擔得起的話，記者個人覺得，同時發佈的Thom Browne版其實更「抵玩」，要知道用得Thom Browne牌頭的產品都唔會平，今次Thom Browne版「只係」貴普通版一萬多少少，開價$27,198，就可以用齊Thom Browne版的Z Fold2、Galaxy Watch 3、Buds Live，仲有埋機殼同靚到流淚的包裝，更重要是全球限量5,000套。講真，用得萬七買電話，真係「唔差在」畀多「少少」買Thom Browne版，要型就型到盡頭嘛，加上「人冇我有」的虛榮心都值回票價。新機普通版及Thom Browne版同樣於9月10日開始預訂（Thom Browne版只限Lane Crawford預訂），9月25日正式開賣。

記者：韓繼聰

編輯：鄒仲安

-----------------------------
專家推介29款抗疫食譜　藥材入饌全面強身
《提升免疫力：抗疫食譜》疫下補身
-----------------------------
英倫生活交流平台 ‧ 移民英國資訊共享
立即加入「逃走他鄉互助會─逃走英國」
-----------------------------
英文版已登錄新版《蘋果》App按此下載/更新