警隊最近請人，吸引到唔少後生仔報考，連警隊一哥鄧竟成個仔都入咗學堂受訓，準備做督察。𠵱家做督察算係筍工，但係早喺四、五十年前，一班第一代華人督察就有唔少辛酸史，佢哋夾喺本地華探長同「鬼頭上司」中間，可以話係左右做人難。最新一期《警聲》訪問咗三位由四十年代至六十年代加入警隊嘅退休督察李福基、劉仁濤同陳福祥，回憶番呢段歷史。
1952年入職做督察嘅劉Sir話，當時各個環頭嘅華探長，地位特別崇高，可以話係「位低權重」，而佢哋呢班督察就夾喺中間，做「鬼頭上司」同華人下屬嘅溝通橋樑，至於具體「溝通」工作做乜，《警聲》冇寫出嚟，八方唔敢亂估，唔知大家有冇頭緒？

另一位受訪者陳福祥就話，佢喺五十年代被派去警隊福利部做嘢，成為福利部首個華人主管。佢創辦咗第一本警隊內部通訊刊物《香港警察雜誌》，可以話係《警聲》之父。個位工作性質都幾騎呢，陳Sir話當年好多夥計不滿伙食，佢為咗了解前線人員疾苦，親身去到各間警署食堂試食，踢爆邊間警署伙食欠佳，督促改善等班手足有好餸食。