古巨基、方皓玟(小明)噚晚喺灣仔會展舉行音樂會，二人除咗合唱，互唱對方嘅歌，仲有唱自己嘅歌，其間基仔喺台上指方皓玟感冒兼喉嚨發炎，叫大家畀啲能量佢：「佢之前綵排，把聲好似男人，o依家好咗一大半。」而大會事前做咗街坊，叫歌迷投票想聽兩位歌手唱咩歌，再揀其中一個投票者上台，可以坐喺台上聽兩位歌手唱歌，亦有歌迷希望佢哋嘅下一代有機會合唱。

完騷之後，二人接受訪問，基仔之前喺加拿大做騷前失聲，之後睇咗醫生唔錯，所以今次就介紹咗畀小明。問到小明有冇擔心演出受影響?佢話：「冇得擔心，食完藥休息，把聲好似牛咁，已經回唔到，但就有痰。」

基仔就笑話綵排時大家都戴口罩，個環境就好似手術室，不斷消毒，古太就介紹小明飲鹹竹蜂。之前有傳古太Lorraine有咗，問到基仔係咪驚怕傳染?佢話：「咩呀！我未問，佢好口密，佢一向都福福地，似新年揮春可以掛起。」對於歌迷期待佢哋都有下一代，小明已經係媽咪，不過基仔就仲未爸爸，佢即笑話：「等我返去搞搞佢先。」

精選娛聞，喺晒《娛果》
http://fb.com/appledailyent