埃及美斯穆罕默德沙拿今季以4,200萬鎊由意甲羅馬轉至利物浦，而佢再次出戰英超又交出好表現，今季英超上陣18場入14球，成為紅軍首席射手。但其實佢嘅英超路絕對唔平坦，之前踢車路士就畀摩連奴投閒置散，最尾仲借咗去意甲。諗返起當初踢車仔嘅時光，沙拿大爆自己當時已經想為利記出力，簡直係身在曹營心在漢!

對於第一次對利記嘅情形，沙拿到依家仲係歷歷在目:「嗰時我代表車路士第一次作客晏菲路，體會到現場嘅氣氛之後，我記得我當時同自己講『終有一日，我會嚟呢度（晏菲路）踢波』。嗰度嘅氣氛真係難以想像!作客晏菲路係一件開心嘅事，但依家我仲開心，因為我已經效力緊利記。」

如今沙拿已得償所願仲做埋利迷嘅至愛，仲證明咗車仔真係冇眼光，但唔知佢咁講會唔會搞到啲車迷㷫過火屎?

-------------------
狂賀！BFB系列推出5​周​年，精彩活動為您安排，立即登入速享專屬優惠！ http://bit.ly/2xrTKG